Volver

Recuperar O Chanto é Prioridade

Código da proposta: MS-2025-11-1

Recuperar o Río Sarria e O Chanto é prioritario: abandono, tala masiva de árbores e propostas artificiais non serven. A demanda é clara: rehabilitación natural e zona de baño limpa e viva.

Recuperar O Chanto é prioridade"

O problema que vivimos hoxe no Río Sarria non é natural nin inevitable. É o resultado dun abandono político deliberado. Durante décadas, este foi un río limpo, coidado e usado por miles de sarriaos e sarriás para bañarse, convivir e facer deporte. Pero agora, ese espazo natural, que era un símbolo comunitario, está convertido nun lugar degradado, con infraestruturas apuntaladas e un río practicamente inutilizable.

1. O abandono do río: un proxecto perdido

O que se anunciou como “o proxecto máis ambicioso para Sarria” acabou botado a perder pola deixadez. As instalacións, antes vivas, levan anos deterioradas. O edificio de servizos está apuntalado desde hai anos, ofrecendo unha imaxe deslucida. E o que máis doe: un río que foi limpo e apto para o baño durante máis de corenta anos, hoxe está totalmente abandonado.

2. A tala masiva de árbores de ribeira: un impacto directo

A tala recente de centos de árbores de ribeira —principalmente ameneiros— na zona do Chanto arrasou coa vexetación natural que daba vida ao espazo. Eliminouse a sombra, destruíuse biodiversidade, desprotexeuse a ribeira e degradouse un lugar que —coa mínima vontade política— podería ser un dos grandes pulmóns verdes de Sarria.

3. Rexeitamento á artificialidade: non queremos “paletadas”

Mentres isto sucede, aparecen propostas de gastar fondos públicos en proxectos artificiais, como piscinas con tobogáns en forma de vieira. A veciñanza xa falou claro:

• “Non queremos gastar o diñeiro en tonterías e paletadas”.

• “Non necesitamos tobogáns nin estruturas artificiais”.

Este tipo de iniciativas non solucionan nada: non recuperan o río, non devolven a natureza, non melloran o espazo comunitario.

4. A demanda veciñal: recuperación natural do río

O que pedimos é sinxelo, sensato e totalmente viable:

• Investir na rehabilitación do río e na creación de piscinas naturais no propio río, como existen en centos de concellos de Galicia e Portugal.

• Habilitar de novo o río para o baño, como antes, con auga limpa e zonas acondicionadas.

• Adecentar O Chanto, recuperando o espazo de ocio que foi e que pode volver ser.

O que queremos é recuperar un lugar que era de todos:

• unha zona de baño natural

• unha área de encontro e convivencia

• un símbolo da identidade dos sarriaos e sarriás, que hoxe moitos lembran, botan en falta e soñan con volver ter.

5. O obxectivo: devolverlle a vida ao río e á comunidade

Esta proposta non é un capricho. É unha chamada á responsabilidade. Á sensatez. Á defensa do patrimonio natural e social de Sarria.

Queremos un proxecto real, útil, sostible e respectuoso. Queremos recuperar o río, non disfrazalo con estruturas artificiais. Queremos volver ter unha zona de baño natural, limpa e viva, como a que sempre tivemos.

 

O río é de todos. O Chanto é de todos. E agora é o momento de recuperalos. Non máis abandono. Non máis “paletadas”. Queremos natureza, río limpo e vida comunitaria. Queremos Sarria. Queremos futuro.

 

• Medio Ambente
• Limpeza
• Cultura
• Turismo

• Sarria